Karak Gaguduh

RAMI urang mamandirakan kabijakan pamarintah nang handak manaikakan haraga BBM pulang. Di mana-mana haja, pukuknya kalu ada urang nang takumpul badua batalu atawa nang tabanyak lagi, pasti ada tapandir kesah BBM.

Mulai urang nang bujur-bujur pintar, sampai nang babaya pintar atawa jua nang paragah pintar, kada tulaitulainya mamander kesah BBM. Mulai nang bapanderan biasa, sampai ada nang hakun bakakancangan urat gulu atawa jua sampai badimu. Pasti sual BBM.

Kaya itu jua bubuhannya nang saban hari duduk mangupi di warung bini Palui, taumpat jua mamanderakan haraga BBM nang naik. Padahal bubuhannya tu kada tapi mangarti banar kesahnya.

Tapi nang ngarannya sudah jadi kesah nasional, tapalit-palit jua jadinya buhannya.

“Nang kaya apa kita handak kada umpat bapandir, mun balum lagi haraga BBM nya naik, haraga barang-barang di pasar sudah saraba naik sabarataan. Apalagi imbah naik,” ujar Tulamak.

“Hi ih, Mak ai. Kangangalihan banar mamayu-mayu akan duit gasan batatukar di pasar,” ujar bini Palui manyahuti.

“Nang sakitnya kita jua kaya ini nah,” ujarnya pulang.

“Kada kawa ai umanya ai. Kadada gunanya jua kita baabut-abut. Kalu pamarintah sudah maanggap itu nang paling baik gasan kita .. kita jalani ai sakawanya, kita ambil hikmahnya haja, kita sangka baik haja,” ujar Palui malamahi nang bini.

“Mudahan ai bubuhan patugas nang diparcaya manjalanakan parugram ini kada baculas, kada manjulungi hagan papadaan inya haja,” jar Palui lagi manambahi.

Garbus nang matan tadi asik manginyul wadai gaguduh umpat jua bapandir.

Aku akur apa jar Palui tadi. Biar ha urang sapasaran balalanjaan manaikakan haraga, nang panting haraga wadai wan kupi di warung bini ikam ni kada umpatan banaik, Lui ai,” jarnya sambil manyulum sisa wadai di tangan.

“Kada kawa kaya itu, Bus ai!” lakas bini Palui manyahuti.

“Gaguduh nang ikam makan tu haraganya banaik jua, sama kaya BBM, wayah ini jadi saribu sabuting, Bus ai.”

“Akai-akai. Kada baingat lalu manaikakan haraga wadai!!” ujar Garbus takajut.

“Gaguduh nang kaya karak hidung ini haja saribu lah sabuting?” ujarnya lagi.

Mandangar wadai bininya dicepa Garbus, lakas Palui manyahuti, “Bus, kalu karak hidung ikam ganalnya kaya wadai gaguduh itu, saratus ribu sabuting aku wani manungkarinya.”

Lihum nang bini wan Tulamak mandangar. Garbus nya maka am kada kawa lagi basuara, dikarubuti urang badua laki bini. (BPost/abr)

One thought on “Karak Gaguduh

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s