Manumpang Dihadapan

Manumpang Dihadapan

Mulai dahulu gawian maujek ini,tamasuk gawian nang tapaksa karna kadada lagi gawian lain. Sabujurnya banyak haja luwungan gawian tapi karna Palui kadada baisian kabisaan maka inya kada kawa maumpati kaya urang jadi pagawai. Ahirnya walaupun gawian maujek itu dianggapnya gawian tapaksa tapi imbah digawinya batahun-tahun tanyata kawa mahidupi anak bininya. Apalagi kariditan sapida muturnya sudah punah maka hasil tarikannya saban hari samunyaan gasan di rumah lawan kawa jua sadikit-sadikit ditabung.

Banyak banar pangalaman suka-sadihnya jadi tukang ujek,tapi karna sudah talanjur diawaki lalu jadi gawian kasayangannya.

“Uiii… abahnya, kalalawasan jadi tukang ujek ini kaina adalah pansiunnya,” ujar bini Palui batakun.

“Kalu pansiun duit pasti kadada tapi pansiun awak uyuh, kulit makin bahirang katuhukan bahujan bapanas lawan batuk manggah kada kawa dihindari,” jawab Palui.

“Kalu cagar basakit kaya itu, baiknya kita bulikan haja ka kampung, babulik pulang bahuma,” sahut bininya.

“Katutuhaan bahuma sama haja cagar kuhuk-hukuk batuk,”ujar Palui.

“Makanya, baihlaslah kita manarima gawian nang sudah ada ini,” ujar Palui mambujuki bininya. Kalu bahuma kada banyak pangalaman kaya di kuta ini. Cuba dangarakan pangalamanku nang lucu salawas maujek ini,” ujar Palui.

“Samalam aku maujek, ada urang minta antar ka subarang Kuin, urangnya lamak banar mungkin baratnya sampai sambilan puluh kilu,” ujar Palui.

“Lalu sampiyan bawalah?” nang bini batakun.

“Ini pasti razaki ganal karna kulihat urang baduit, pinanya kaya urang bagawi di kapal. Tapi imbah kutakuni sakalinya bubuhan papadaan jua, urang Nagara, sahut Palui. Inya kada batatawaran lagi ungkusnya tapi minta supaya babuat di hadapan sapida mutur. Inya takutan duduk dibalakang kalu tajunggat sapida muturnya karna awaknya ganal banar. Karna inya nang handak maka kusuruh si Lamak ini manyatangnya, lalu aku duduk mambunceng dibalakangnnya. Karasaan banar jalan sapida mutur bahunjal-hunjal karna bannya kempis,” ujar Palui bakisah lawan bininya.

“Kaya apa si Lamak itu manyatang, pina bisa hajalah?”

“Aku tapaksa baragap ka awaknya karna inya mang-gas laju banar sampai asa mangingnging talinga,” jawab Palui. “Eeee…..parak sampai kasimpangan Kuin, sakalinya disana ada razia Operasi Zebra. Kami dipariksa, sakalinya si Lamak tadi kada baisian rebuwis.Jangankan rebuwis, surat-surat lainnya kada baisian jua. Si Lamak diulahakan surat tilang tapi sapida mutur bulih jalan tarus maantarnya sampai ka Kuin karna sapida mutur langkap surat-suratnya.

“Alhamdulillah…..ujar Palui, imbah inya turun sabalum naik kalutuk handak ka kapal aku dijulunginya lipatan duit gasan bayar tilang lawan gasan ungkus ujek. Lumayan banyak, kawa ganti kada maujek sampai dua minggu,” ujar Palui.

“Alhamdulillah jua ulun abahnya ai, mudahan dapat tampiasnya kawa mangganti tapih baju nang sudah buruk ini,” sahut nang bini sambil mangibit tangan Palui. (tam)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s