Manjual Tanah Nagara

LAWAS Palui tulak madam ka Banjar, ada pang satangah tahun kada saling bulikan ka kampung. Wayah bulik takajutan bubuhan kakawalannya malihat awak Palui nang pina makin balamak haja.

Imbah badandam-dandaman, lalu Palui mambawai kakawalannya itu minuman ka warung acil Irus.

“Awak ikam itu pina makin balamak haja, Lui ai, makin bamakmur hiduplah?” ujar Garbus maambung Palui wayah makan di warung acil Irus.

“Amun ikam handak makan bapadah ja Bus ai kada usah ba-ambungan, kaina aku nang mambayarinya,” ujar Palui.

“Pas banar waktunya Lui ai, habis zuhur parut lapar dan ikam manawari. Ujar paribahasa sama wan mancari undayang tatamu suluh,” ujar Garbus.

“Sual duit kita cari-carian, tapi sual bakawan jangan sampai pagat. Kabalujuran dapat razaki makanya wajar haja kita nikmati basama tamasuk ikam,” ujar Palui.

“Alhamdulillah, tamasuk jua aku …,” ujar Tulamak umpat manyahut.

“Ayu pasan haja napa nang ikam sukai, iwak hayam, patin bapais, sambal guring, hintalu masak habang, soto, asal…,” ujar Palui.

“Asal napa Lui, maka ba-asal. Kalu ba-asal itu artinya kada ihlas,” ujar Tulamak.

“Maksudku wan asal itu adalah asal jangan mambungkus mambawa bulik,” ujar Palui tatawa.

“Di Banjar ikam bausaha napa Lui, maka pina makin banyaman hidup,” ujar Garbus.

“Aku manarusakan gawian aruwah pakayian di banua dahulu, yaitu bajual tanah,” sahut Palui.

“Kalu kaya itu ikam pasti bamudal ganal, karna bajual tanah apalagi tanah kaplingan mudalnya harus ratusan juta,” ujar Tulamak.

“Aku kada bajual tanah kaplingan gasan parumahan Mak ai,” ujar Palui.

“Lalu tanah napa nang ikam jual?” ujar Garbus.

“Aku bajual tanah nagara,” ujar Palui singkat.

“Babahaya Lui ai dan ikam bisa ditangkap pulisi kalu ikam wani manjual tanah nagara, tanah pamarintah. Maksud ikam tanah nagara nang ada di Burung Lapas atawa di pagunungan Maratus itukah?” ujar Garbus.

“Aku bajual tanah nagara sasuai gawian datuk kayiku dahulu. Tanah itu diulah jadi dapur, jadi gadur, jadi parapin, jadi kapit, macam-macamlah lalu dijual di Banjar,” ujar Palui. “Ooo … ikam bajual tanah nang sudah diulah jadi dapur, gadur wan parapin matan kuta nagara di Daha itukah?” ujar Tulamak paham.

“Nah, Tulamak paham,” ujar Palui.

“Paham napa Lui?” sahut Garbus.

“Aku paham Bus ai sakalinya si Palui ini katurunan urang Nagara jua,” ujar Tulamak mangalakak tatawa. emhati(repro)

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s