KADA nyaman-nyaman hidup di kuta, bujur haja napa haja tasadia dan saraba ada tapi samunyaan harus dihurupi wan uncui alias duit. Jadi bila kada bauncui tapaksa ai maharit, mamakan nang ada. Jangankan makanan wan nginuman atawa tapih baju, di kuta itu bakamih haja harus babayar.

Palui sudah parak satahun ini badiam di banjar. Macam-macam gawian sudah inya gawi nang panting kawa hidup wan kawa manyakulahakan anaknya. rasa lapah jua inya satiap hari banting tulang, maka haraga barang wayah ini saraba larang. Nang kasihan lagi bininya Palui, maklum hidup bajiran batatangga di kuta pina bahaharatan tarus, manukar baju tapih sampai tivi wan kulkas atawa makanan musti ba-agak, dipander kahulu kahilir hingga sakit hati nang kada kawa manukar. Parnah jua bininya itu manangis-nangis bulik ka rumah karna sakit hati haur diagaki ulih urang.

“Maka itu kita harus kuat-kuat iman bila hidup batatangga wan urang sugih,” ujar palui wan bininya.

“Ulun ini sudah jua basabar abahnya ai, tapi ulun handak jua nangkaya urang supaya urang kada marimihakan tarus. Ulun handak jua baisian kulkas, tivi nang bakalir langkap wan pisidinya,” ujar bininya.

“Biar haja urang manyambat umanya ai, nang panting kita kawa hidup wan kada baulah jahat maka kita cagar salamat dunia akhirat,” ujar Palui mambisai bininya.

Tapi rupanya sasabar-sabar Palui bisa jua takarasi handak umpat bahaharatan, yaitu wayah umpat ba-arisan di kacamatan. Wayah itu kakawalannya samunyaan pina basapida mutur, hanya Palui haja nang basapida uncal bahiri jua inya wan kakawalannya itu. Makanya wayah bulik ka rumah dikisahakannya wan bininya bahwa inya handak jua manukar sapida mutur biar buruk asal kawa manggalugur bunyinya.

“Amun ikam hakun balului umanya ai maka kita kawa jua basapida mutur kaya urang,” ujar Palui mamanderi bininya.

Rupanya bini Palui tadi kada tapi mangarti nang dimaksud lakinya itu, maka inya langsung haja mahakuni napa nang Palui minta. Kada lawas imbah bapanderan tadi, bini Palui langsung ka kamar.

“Uuuuuuiiii….. abahnya lakasi masuk ka kamar, aku katuju haja napa nang sampiyan kahandaki itu,” ujar bini Palui kukuciak bakiyau.

Lalu Palui masuk, sakalinya bininya Palui itu bujur-bujur balului……. balului baju tapih wan kutang. Rupanya bini Palui salah mangarti, maka tapaksa ai Palui manuruti napa nang dikahadaki bininya. Walaupun nang dimaksud palui balului itu kada lain adalah balapas galang wan kangkalung amasnya gasan dijual lalu ditukarakan sapida mutur. (ivd/mht)

WALAUPUN urang datangan haji sudah babulan-bulan tapi bubuhan Palui hanyar haja tahu bahwa mamarinanya Garbus tulak haji jua tahun tadi. Bubuhannya kada tahu karna sidin umpat kaloter di daerah urang dan hanyar haja datang ziarah kabanua. Ujar Garbus, sidin naik haji karna ada nazar handak maubah ngaran.

Sabujurnya ngaran sidin mulai matan halus adalah Julan, tapi wayah lagi mandian di sungai bubuhannya rami bahuhulutan. Wayah itu Julan babaju habang, lalu dikiyau wan dihuhuluti bubuhannya : baju Julan habang, baju julan habang……. Rupanya wayah inya bahuhulutan itu ada bibinian paharatan bahira di jamban, lalu marasa tasinggung, lalu manyanyarik.Sarik kaanu bubuhan Palui karna dikiranya kakanakan itu maintip inya bahira di jamban, mamadahakan juburnya bajujulan habang.

Karna gara-gara bahuhulutan bajujulan habang itulah akibatnya Julan ramuk dihukumakan si laki bibinian tadi.

“Uiii… pak haji Julan, cuba pang bakisah kaya apa di tanah suci itu,” ujar Palui wayah inya batamu di rumah Garbus.

“Lui, ngaran sidin jangan dikiyau Haji Julan lagi karna imbah haji ini sudah batasmiah ngaran hanyar sidin Haji Mardu, ujar Garbus managur Palui.

“Aku hiran jua Lui ai,” sahut Haji Mardu. “Kalu kita sembahyang disini musti ampah ka barat ka ampah matahari tinggalam, tapi disitu ampahnya bulih haja kabarat, katimur atawa utara salatan,” ujarnya.

“Ooooo….kaya itulah,” sahut Palui lihum sambil dalam hatinya baucap pas banar mamilih ngaran H.Mardu. “Lalu apalagi nang pina anih-anih?” ujar Palui batakun pulang.

“Anu Lui ai, tanah Arab itu karing, bagurun pasir bagunung batu, tapi hebatnya samunyaan buah-buahan sampai kangkung tarung iwak karing ada di jual di Pasar Seng. Jadi artinya samunyaan kawa tumbuh disitu,” sahut Haji Mardu.

“Itulah kakuasaan Tuhan Ji ai,” sahut Palui, walaupun inya tahu bahwa barang-barang itu datang matan luar nageri. Garbus taumpat lihum mandangarakan panderan Palui wan mamarinanya.

“Ada lagi nang paling anih Lui ai. Kalu kita di banua balajar mangaji mulai a-a-lifan sampai kawa ka quran babulan-bulan hanyar bisa lancar, itupun harus dikarasi balajarnya. Tapi di Arab situ kakanakan balajar mangaji kada ba a-a-lifan lagi tapi langsung ka quran,” ujar Haji Mardu.

“Kira-kira apa sababnya maka bisa kaya itu,” ujar Palui.

“Itulah rahmat Tuhan, karna disana matan lagi halus kakanakan sudah bisa banar bahasa Arab. Dimana-mana kakanakan paparucus kada canggung-canggung bapander bahasa Arab, bingung kita mandangarnya,” ujar Haji Mardu bahimat manarangakan.

Palui wan Garbus taimbai tatawaan sambil mamadahakan mamarinanya ini harat banar, banyak kamajuan salawas datang bahaji.

“Mudahan sampiyan panjang umur kawa bahaji pulang,” ujarnya badua sambil dalam hatinya baucap pas banar mamilih ngaran H.Mardu alias Haji Mardut. emhati(repro)

SUDAH talu hari ini Palui kada turun bakakawalan. Biasanya saban hari inya musti cangul ka warung acil itu atawa duduk-duduk di gardu.

Bubuhannya sawat jua takun-takunan kamana garang maka Palui manghilang, kada kalihatan batang hidungnya. Ada nang manangguh Paluinya madam ka Jawa, ada jua nang mamadahakan bahwa Palui bulik ka pahuluan. Tapi banyak jua nang manangguh Palui garing.“Kalu kaya itu kita ilangi ka rumahnya kalu pina garing. Maklum wayah ini musim bahiraan,” ujar Garbus.

“Nang banyak garing bahiraan itu Bus ai adalah kakanakan. Kalu kita sudah tuha-tuha ini jarang nang garing bahiraan. Nang banyak sakit jantung, darah tinggi, batuk-batuk, asam urat atawa sakit tulang,” ujar Tulamak.

Ahirnya bubuhannya sapakat bailang ka rumah palui. Sakalinya Paluinya ada haja di rumah, tapi dasar bujur kalihatan pina pucat banar muhanya, wan pina kasakitan parut.

“Sabujurnya ikam garing napa Lui?” ujar Tulamak imbah sampai di rumah Palui.

“Aku sakit parut, sakit banar,” sahut Palui.

“Nah, pas kalu tangguhanku, pasti inya ma-arit parut karna wayah ini musim bahiraan. Ubatnya gampang haja kalu bahiraan tuha ini, makan karak nasi hangit, nginumi banyu jarangan daun jambu pasti kawa manahan bahira,” ujar Garbus.

“Aku kada garing bahiraan Bus ai, malah sabaliknya aku sudah babarapa hari ini kada kawa bahira, hingga parutku sakit banar,” sahut Palui.

“Kalu itu bapariksa ka puskesmas haja,” ujar Tulamak.

“Samalam aku sudah jua bapariksa ka mantri, bahkan tahikupun dipariksanya jua,” ujar Palui.

“Lalu napa panyakitnya Lui?” ujar Garbus.

“Aku disuruhnya nginum minyak gas,” sahut Palui.

“Sakit napa maka ubatnya disuruh nginum minyak gas?” ujar Tulamak pina bingung.

“Babarapa hari tadi aku mamakan gula batu karet barian kamanakanku, nyaman banar. Karna kanyamanan maka langsung kutaguk sampai habis sakutakan. Rupanya karna gatah gula batu itu maka tahiku marikit jadi satu. Makanya gasan maluntur gatahnya dikuras wan minyak gas, kaya biasanya kita maluntur gatah nangka,” ujar Palui bakisah.

“Kalu kaya itu Lui ai ikam jangan bahira di parak kompor kaina bisa banyala karna api manyambar tahi ikam,” ujar Tulamak mahuhulut karna kada parcaya panderan Palui itu. emhati(repro)

TUMATAN halus Palui bacita-cita handak jadi Tuan Guru. Sasuai wan cita-citanya maka kamana haja inya pasti pakai baju, tapih, salawar atawa kupiah wan surbannya bawarna putih. Pukuknya kada kalah wan Tuan Guru nang asli.

Hanyar-hanyar tadi, parahatan Palui handak bamagrib ka langgar, inya tatamu wan Garbus nang mahabarakan bahwa mamarinanya Palui kana batabrakan dan sudah dibawa ka Rumah Sakit Ulin Banjarmasin.

“Uui Lui, capat ikam ka Banjar mamarina ikam batabrakan, sidin dirampak trak,” ujar Garbus mamadahi Palui.

“Astagfirullah, bujurankah Bus, nangkaya apa kaadaan sidin sakarang,” jar Palui takajut

“Bujur Lui ai, sabab aku tumatan datang di Banjar dan umpat maatarakan mamarina ikam ka rumah sakit,” ujar Garbus.

Imbah tuntung sambahyang Maghrib bubuhan Palui wan Garbus langsung bataksi ka Banjar dan sampai tangah malam. Bubuhannya langsung batakun lawan patugas jaga, di mana kamar kurban tabrakan siang tadi.

“Ayu Lui langsung kita ka ruang Malati kamar III,” jar Garbus imbah tuntung batakun.

“Hadangi satumat Bus, aku handak sambahyang Isya di Mushalla muka dahulu. Lamun ikam handak badahulu kada papa kaina kita batamuan haja,” ujar Palui.

Imbah tuntung ba-isya Palui langsung masuk mencari ka ruang Malati, wadah mamarinanya dirawat. Tapi parahatan inya bajalan di lurung panyakit dalam wanita, Palui takajut ada bibinian saling langkaran manjuhut tangannya dan membawa masuk ka kamar.

“Ayu Dok, tulungi mama ulun nah, sidin kasakitan banar,” ujar si gadis tadi.

“Astagfulillah ingat lawan Tuhan,” ujar Palui takajut-kajut. “Sabujurannya aku kadada jadwal bakunjung ka ruangan nangini pang,” jar Palui bapandir.

“Pukuknya tulungi Dok ai, uma ulun lamun kawa disuntik, suntik haja supaya sidin kada kasakitan lagi,” ujar gadis tadi sambil meragap-ragap minta tulungi sambil tatangis-tangis.

“Hauuu…, napa ini…. Harum… eeeh salah, hantup… eeeh salah pulang…. Haram,” ujar Palui takajut-kajut diragap babinian nang saling bungasan ini.

“Sabujuranya aku ini kada kawa manyuntik urang nang lagi kasakitan ding ai, lamun manyuntik ikam bisa ai,” jar Palui pulang.

“Hauuu…, nang garing itu uma ulun, kanapa jadi ulun nang handak pian suntik. Capati ubati uma ulun nah,” jar si gadis pulang

“Nah… itulah masalahnya, sabujurannya aku lain dokter, aku nangini sama wan ikam jua nang manjanguk atawa manjaga kulawarga nang garing. Makanya jangan tatipu wan panampilanku nang saraba putih nangini,” jar Palui.

“Haahh… kanapa hanyar haja bapadah lain dokter,” ujar si gadis takajut langsung malapas maragap Palui. “Ini artinya pian mancari kasampatan dalam kasakitan,” ujarnya pulang manyarik dan manyuruh Palui bajauh.

“Ini ngaranya berkah razaki ding ai,” ujar Palui sambil bukah kahimungan.

PALUI wan Garbus rami mamander Tulamak nang bila sembahyang pasti mamacul salawar dalam karna najis. Tulamak itu karna gancang makan wan nginum lalu pangamihan. Marga itu Tulamak jadi hehulutan kakawalannya.

“Aku mangaku haja bahwa mulai dahulu sampai wayahini aku pangamihan banar. Rancak bakamih itu manurut ilmu kasihatan baik banar,” ujar Tulamak baulah alasan.

“Napa alasannya maka dipadahakan baik,” ujar Garbus.

“Bila rancak bakamih, artinya lancar mambuang banyu, makanya aku kada cagar sakit batu marin, kada cagar sakit ginjal,” ujar Tulamak.

“Tulamak mimang pintar baulah alasan Bus ai. Tapi karna inya sembahyang kada basalawar dalam itulah maka kudangar inya rancak bakalahian wan bini,” ujar Palui ma-alih pander.

“Napa kisahnya maka sampai rancak bakalahian wan bini gara-gara salawar dalam itu Mak? Apakah bini ikam takutan kalu barang ikam kalihatan urang,” ujar Garbus batakun.

“Kalu bahual dan bakalahian wan bini sual biasa haja dalam barumah tangga, anggaplah asam garamnya parkawinan,” ujar Tulamak.

“Mangaku ja Mak ai. Bila ikam kada mangaku Mak ai maka kubuka rahasia ikam,” ujar Palui.

“Ayu buka ja napa alasan aku bakalahian wan bini,” ujar Tulamak manantang dan kada takutan rahasianya dibuka.

“Ampun maaf Mak-lah, babarapa minggu ini kudangar ikam bahual tarus wan bini gara-gara salawar dalam. Ikam mangarasi dan manyauruh bini ikam, bila maulah salawar jangan batali tapi baiknya bagatah atawa bakima. Jadi ikam sarik wan bini karna salawar dalam ikam diulahakannya batali. Bujurlah?” ujar Palui.

“Hiih, bujur Lui ai,” ujar Tulamak sadar dan mangaku.

“Kanapa maka gara-gara salawar dalam batali maka bakalahian?” ujar Garbus.

“Gara-gara salawar dalam batali itulah maka Palui rancak kada jadi umpat sembahyang. Inya langsung bulik karna … tali salawarnya tajarat mati, padahal inya handak banar bahira bahkan sampai tacirit di salawar,” ujar Palui mambuka rahasia Tulamak.

“Lui, ui kisah lain haja Lui ai. Aku mangaku kalah,” ujar Tulamak kasisipuan pina supan. emhati (repro)

IMBAH datang dua talu kali madam, Palui pina makin baubah banar. Tapi nang baubah paling pakaian baju salawarnya, kalakuannya tatap haja kaya bahari. Kalu dahulu salawarnya kain katun maka wayahini sudah baganti wan salawar lepis tabal, kalu dahulu rambutnya lungkup, wayahini bajambul nangkaya bubuhan ABG.

Kaya itu jua bapandernya pina tacampur-campur wan bahasa laut. Tapi biar kaya apa haja haratnya inya bapander bahasa laut, tatap haja mucai tapuntal-puntal karna lagunya adalah lagu pahuluan jua.

“Salamat batamuan Lui, kami dandaman,” ujar Tulamak wayah batamuan.

“Ikam ini Lui, Palui dahulu juakah atawa Palui wayahini,” ujar Garbus sambil mahuhulut.

“Aku Palui nang hanyar datang madam. Palui BA,” ujarnya sambil manyalami tangan garbus.

“Hau kanapa maka batambah BA, apakah ikam sudah sarjana muda? Atawa BA alias banyak anak?” ujar Garbus.

“Kita tadi balum basalamanlah Lui, kenalkan ngaranku Tulamak AK,” ujar Tulamak mambalas manambahi ngarannya wan Ak.

“Dasar harat ikam kawa sakulah akuntansi sampai bagalar Ak alias ahli kauangan,” ujar Palui.

“Kalu ngaran bubuhan ikam batambah galar, maka aku pun diam-diam sawat kuliah jua, makanya ngaranku Garbus ST,” ujar Garbus manambahi ST.

Wayah bubuhannya bahaharatan galar maka datang pambakal mamaraki sambil baucap: “Aku tamasuk urang nang himung banar karna kada kukira tanyata bubuhan ikam pintar-pintar, mungkin masing-masing kuliah jarak jauh,” ujar pambakal.

“Sabujurnya Palui nang mamulai batambah-tambah galar di balakang ngarannya, kami kada hakun kalah jua,” ujar Garbus batarus tarang.

“Lalu napa kapanjangan galar-galar pangkat ikam itu?” ujar pambakal handak tahu.

“Ulun batambah BA itu karna ulun urang Bitin Alabiu,” ujar Palui mangaku.

“Mulai tadi kami sudah paham bahwa Palui bakaramput, makanya kami pun bakaramput jua. Ngaran ulun batambah Tulamak Ak itu karna ulun urang Amawang Kiri,” ujar Tulamak mamacahakan Ak.

“Ikam Bus kanapa maka ngaran Garbus ST apakah sarjana tehnik,” ujar pambakal.

“Ulun lahir di Amuntai dan kampungnya adalah Sungai Turak alias ST makanya Garbus ST,” ujar Garbus mangalakak tatawa.

“Samunyaan ini gara-gara Palui nang mamulai,” ujar Tulamak.